Ньурба оройуонун Малдьаҕар нэһилиэгин «Чуораанчык» оҕону сайыннарар киин уһуйаана «ROBOTICS CHAMPIONSHIP – MОСКВА 3.0» РОБОТОТЕХНИКА НАЦИОНАЛЬНАЙ ЧЕМПИОНАТЫГАР номинация кыайыылааҕынан буолла

Аныгы технология сайдыытын тэтимэ балысханнык тохтоло суох иннин диэки баран иһэр. Ол тэтиминэн тэбис-тэҥҥэ хардыылаһан иһэр ыраах сытар Ньурба оройуонун Малдьаҕар нэһилиэгин «Чуораанчык» оҕону сайыннарар киин уһуйаана буолар.

 

Ол курдук, бу уһуйаан 3 иитиллээччитэ Слепцов Борис, Филиппова Василена, Семенов Айгылаан, төрөппүттэрэ уонна салайааччылар Кононова Мария Викторовна, Ушканова Ольга Семеновна буолан, бу кулун тутар 18 күнүгэр Москваҕа буолбут «ROBOTICS CHAMPIONSHIP – MОСКВА 3.0» РОБОТОТЕХНИКА НАЦИОНАЛЬНАЙ ЧЕМПИОНАТЫГАР

«За благородный профессионализм» диэн номинацияҕа кыайан-хотон кэллилэр. Хамаандалара ааттыын «Чаҕылыс», кыбыстыбакка нууччалыы тылынан көҥүллүк, иҥнэн-толлон турбакка, экспертэр ыйытыыларыгар барытыгар үөрэ – көтө чобуотук хоруйдаһан чаҕылытан иһэллэрин көрөн, дьүүллүүр сүбэ үрдүк сыанабылы биэрдэ. Бу оҕолор ситиhиилэрэ барыта, сүдү эппиэтинэhи чиэстээхтик сүгэ сылдьар, айымньылаах үлэлэринэн ураты суоллаах-иистээх үлэһиттэрин үтүө түмүгэ буолар. Уһуйаан сэбиэдиссэйэ РФ уопсай үөрэхтээһинин бочуоттаах үлэһитэ, СР үөрэҕириитин үтүөлээх үлэһитэ, СР уерэгириитин туйгуна, «Оскуола иннинээги уерэхтээьиннэ кылаатын иьин» бэлиэ хаьаайына, нэһилиэк бочуоттаах олохтооҕо, 30-н тахса сыл сатабыллаахтык салайан кэлбит – Таисия Васильевна Иванова буолар. Кини педагогтар үлэлииллэригэр, оҕо сөптөөх эйгэҕэ иитиллэн сайдарыгар туох баар услуобуйаларын олохтоон, тэрийэн, бэлэмнээн биэрэн иһэр. Ол курдук, детсакка эбии үөрэхтээһини сайыннарар сыалтан, анал оборудованиялардаах «Ɵркѳн ѳй» хоhо диэн аһыллан үлэлиир. Бу манна оҕо ѳйѳ-санаата киэҥник сайдарыгар педагогтар араас анал программаларынан дьарыктыыллар.

 

Ол иһигэр, оҕолору робототехникаҕа үрдүк категориялаах иитээччи Мария Викторовна Кононова хаһыс да сылын үөрэтэн, үгүс элбэх ситиһиилэммиттэрэ. Олортон саамай улаханнарын ааттаталаатахха 2018 сылга Самсонов Николай Таиланҥа ыытыллыбыт Норуоттар ыккардыларынааҕы робототехника күрэҕэр кыттан финалист буолбута; 2020 сылга Петров Ярик уонна Духов Айтал республиканскай күрэххэ «Переработка мусора» диэн хайысхаҕа 6 сааһыттан 12 сааһыгар дылы оҕолорго рекорд олохтообуттара; 2021 сылга Нижнэй Новгородка ыытыллыбыт робототехника национальнай чемпионатыгар Филиппова Чэмэлиинэ, Кононова Айсена, Слепцов Борис баран кыттаннар «Стремление к знаниям» диэн номинация кыайыылааҕа буолбуттара.

Ити курдук, быйыл эмиэ өссө үрдук номинация ыланнар нэьилиэк дьонун үөртүлэр. Бу «Чуораанчык» ситиһиилэрэ бу эрэ хайысханнан муҥурдаммат. Кинилэр бары өттүнэн сайдыылаахтар, кыахтаахтар диэтэхпинэ сыыспатым буолуо. Бу маннык кыра сааһыттан оҕо аныгы технологияны баһылыырга үөрэнэн истэҕинэ, кини инники өссө атыны баһылыырыгар, саҥаттан-саҥа айыллан иһэригэр бэлэмнээх буолара саарбахтаммат. Бу оҕолор салгыы оскуолаҕа тахсан, бу дьарыктарын бырахпакка сайыннаран иһэллэрэ буоллар диэн баҕа санаалаахпыт.

Уhуйааммыт барахсан Үүнэн-сайдан чэчирээн, Аартыктаах суола арыллан Үгүс үйэлэргэ аатыра турдун!

Подробнее: https://xn--90adptbcs3gya.xn--p1ai/article/47037