Чаппандаҕа 100/50 миэстэлээх оскуола-саад дьиэтэ үөрүүлээхтик аһылынна

Ахсынньы 1 к., улууска бэлиэ түгэн – Чаппандаҕа 100/50 миэстэлээх оскуола-саад дьиэтэ үөрүүлээхтик аһылынна. Өрөспүүбүлүкэ, улуус салайааччылара, ыраахтан-чугастан ыҥырыылаах ыалдьыттар, олохтоохтор уо.д.а. кытынннылар. Аалай лиэнтэни СӨ Бырабыыталыстыбатын Бэрэссэдээтэлин солбуйааччыта Сергей Местников, улуус баһылыга Алексей Иннокентьев, С.П.Алексеев-Боhуут аатынан Чаппанда орто оскуолатын дириэктэрэ Юрий Алексеев уонна 11 кылаас үөрэнээччитэ  Антон Иванов быһа кырыйдылар. Иһирдэ киирэн оскуола-саад устун экскурсия тэриллэн, бары кэлбит ыалдьыттар «Сэттэ” тутуу тэрилтэтэ оскуола-саад тутуута олус хаачыстыбалаахтык уонна тупсаҕайдык туппутун бэлиэтээтилэр. 

Аактабай саалаҕа тэрээһин үөрүүлээх чааһа салҕанна. Улуус баһылыга Алексей Иннокентьев, СӨ Бырабыыталыстыбатын Бэрэссэдээтэлин солбуйааччыта Сергей Местников, Ил Түмэн судаарыстыбаннай тутулга уонна олохтоох салайыныы боппуруостарыгар сис кэмитиэтин бэрэссэдээтэлэ Владимир Прокопьев, СӨ спордун миниистирэ Леонид Спиридонов, СӨ үөрэх уонна наука миниистирин 1-кы солбуйааччыта Алевтина Аргунова, нэһилиэк баһылыга Краснослав Бухолов эҕэрдэ тылларын эттилэр. Чаппанда оскуолатыгар Сергей Местников саха тылын уонна литературатын толору хааччыллыытын туһунан сэртипикээти уонна оптуобус сэртипикээтин үөрүүлээх быһыыга-майгыга туттарда. Элбэх     киһиэхэ – үөрэх үлэһиттэригэр уонна тутааччыларга наҕараадалар туттарылыннылар. «Сэттэ” тутуу тэрилтэтин салайааччыта Федор Яковлев оскуола дириэктэрэ Юрий Алексеевка ытыс тыаһын ортотугар дьиэ символическай күлүүһүн туттарда.
Чаппанда оскуолатын дириэктэрэ Юрий Алексеев: “Оскуола-саад 2019 с. сыбаайа түспүтэ уонна номнуо бу үлэҕэ киирдэ. Чахчы даҕаны, тыа сиригэр мээнэ суох оскуола буолар, миэбэлинэн уонна оборудованиетынан, благустройствотынан ситэри хааччыллыылаах. Оскуолалары кытта тэҥнээн көрдөххө, сүрүн болҕомто эбии благостройствоҕа уурулунна. Саамай сүрүн уратыта – федеральнай бырагырааманан буолбакка, үксэ улууспутугар АЛРОСА-тан киирэр дивидент суотуттан уонна өрөспүүбүлүкэттэн кыттыһыылаах тутулунна. Саҥа, киэҥ-куоҥ үөрэх уораҕайа аһыллыбытынан улууспут баһылыга Алексей Михайлович Иннокентьевка, биир дойдулаахпытыгар Макар Семенович Семеновка уонна “Сэттэ» тутуу хампаанньатын салайааччыта Федор Дмитриевич Яковлевка махталбыт муҥура суох.  50 сыл буолан баран биһиэхэ саҥа оскуола тутулунна. Бу – биһиэхэ олус улахан историческай суолталаах түгэн. Биһиги инникитин креативнай индустрия диэн хайысханан үлэлиэхтээхпит, култуура+үөрэх тосхолунан. Оччоҕо өрөспүүбүлүкэҕэ бастакынан култуура уонна үөрэҕирии систиэмэтин хайысхатынан,  АГИКИ-ни кытта улахан сетевой оскуола арыллыахтаах. Инникитин федеральнай да бырагыраамаларга киирсиэхпитин сөп».  

Геннадий АНТОНОВ иһитиннэриитэ 

Мы используем cookie-файлы для наилучшего представления нашего сайта. Продолжая использовать этот сайт, вы соглашаетесь с использованием cookie-файлов.
Принять
Политика конфиденциальности