Алена Атласова Дьокуускай куорат Саха национальнай гимназиятын ыһыаҕар кытынна

Саха омук биир түҥ былыргыттан силистээх, күөххэ үктэммитин үөрэ-көтө көрсөр, самаан сайыны уруйдуур-айхаллыыр Үрүҥ тунах ыһыаҕынан А.Г. уонна Н.К. Чирээйэптэр ааттарынан Дьокуускай куорат национальнай гимназията үөрэх сылын өрөгөйдөөхтүк түмүктээтэ.

САССР төрүттэммитэ 100 сылыгар уонна Өрөспүүбүлүкэбит Ийэ сылыгар аналлаах ыһыахха үөрэнээччилэр, учууталлар, төрөппүттэр, ыалдьыттар мунньустан үөрэҕи, үлэни, күрэҕи, сынньалаҥы дьүөрэлээн тутан, самаан сайыны үөрэ-көтө көрсө Үс Хатыҥҥа Кымысчыт Байбал сиригэр-уотугар ааспыт өрөбүлгэ ыһыах ыстылар.

Бу тэрээһиҥҥэ Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ Алена Атласова кытынна. 2021-2022 сс. үөрэх дьылын түмүгүнэн кэккэ ситиһиилээх учууталлары, үөрэнээччилэри эҕэрдэлээтэ. Дириэктэри солбуйааччыларга Сардаана Ефремоваҕа, Саргылана Адамоваҕа уонна Анна Макароваҕа Ил Түмэн дьиэ кэргэн уонна оҕо аймах дьыалаларыгар сис кэмитиэтин бочуоттаах грамотатын туттарда.

Айылҕа бу күн үөрбүт, кэтэспит курдук чаҕылхай күннээх буолла. Киирэр аартыкка дириэктэр Валентина Пермякова ыһыахха мустубут бар дьону уруйдаан-айхаллаан, түптэ унаар буруотунан арчылаан көрүстэ, дьону турукка киллэрэн сэргэхситтэ. Түһүлгэҕэ ийэлэр алгысчыт  суолун арыйан олус намчытык, чуумпутук киирэн түптэ унаар буруотун умаппыттарыгар сылаанньыйан бары да иһийэн ылбыттара. Алгысчыт  Борис   Николаевич Михайлов–Айылҕан алгыһа сүрэҕинэн–быарынан киирэн, уйулҕаны хамсатан олус долгутта, уйадытта. Оҕолор сахалыы тыыннара уһуктубутун алгыс кэмигэр, сэргэхтик сэҥээрэн, истиҥник иһийэн, көхтөөхтүк кыттыспыттара туоһулуур.  

Бу кэннэ тутатына «Алгыстаах кымыс амсайыы» сиэригэр–туомугар гимназия дьоно-сэргэтэ, ыалдьыттара бары чороонноох кэлэн алгыстаммыт кымыһы симиир иһиттэн куттаран, өрө көтөҕүүлээх иһэн күүс–уох эбиммиттэрэ.

Урут-уруккуттан сиэр быһыытынан ыытылларын курдук оҕолор парааттаан киирбиттэрэ. Оһуохай, «Саха таҥаһын сиэдэрэй симэҕэ» дьиэ кэргэнинэн, өбүгэ оонньууларын, хабылык күрэстэрэ, эҕэрдэ кэнсиэр курдук тэрээһиннэр көхтөөхтүк биир тыынынан ааспыттара.

Төрөппүт Баайаҕантай Кулан Хаан Сэргэй уола түһүлгэни биир гына олус киэҥ оһуохайы оройуттан тутан көтүтэн, үрдүкү Айыылары кытары ситимнээтэ.

Төрөппүттэр спонсордааннар ыһыах буолар күн иннинэ биэ идэһэлэнэн астаммыта, гимназия бүттүүн ыалдьыттарын кытта сип-сибиэһэй эт амсаппыттара, өбүгэ оонньуутугар кыайбыт улахан уолаттар мүһэ сүүйбүттэрэ.

Оҕолор сахалыы тыыннара уһуктан, төрүт култуураларын көрөн-истэн, кыттыыны ылан биир сүрүн сахалыы үөрэҕи, ыһыах ыһар, күөххэ үктэнэр сиэрин-туомун иҥэриммиттэригэр бигэ эрэниллэр!

Ил Түмэн пресс-сулууспата